【爆笑】點樣可以阻止老母繼續包麥提沙湯丸畀我食?

700

是咁的,元宵節嗰日,有網友嘅阿媽好雀躍咁同佢講,自己學識咗包「麥提沙湯丸」,網友話難得見阿媽佢突然心血來潮咁包湯丸,佢緊係唔會拒絕啦!

正當佢阿媽嗌食得嘅時候,網友見到 …

湯丸煮過之後全部爆開晒,只見到糯米皮同麥提莎;有啲麥提莎直頭融咗,變成朱古力湯底 !!

網友中伏 … 佢阿媽就解釋:「唔小心煮爆咗少少,照食都好好食㗎仔」。

不過網友都好有孝心,見到咁伏都照食落肚,而且仲同佢阿媽講:「啲麥提沙湯丸好好食。」

阿媽聽到就梗係勁開心啦… 但咁就仆街啦 !!!

網友阿媽見個仔咁鍾意食自己包嘅湯丸,就行入廚房繼續包 … 前後包近200粒,早午晚三餐都整,足足食咗三日三夜!

網友真係好孝順,佢每次都食晒,但已經唔知道自己食緊啲咩嘢 … 於是佢就喺 LIHKG 開 PO 問:「點樣可以阻止老母繼續包麥提沙湯丸畀我食?」


網友回應:

「幾warm啊, 我係你就食晒佢」

「同佢講食多幾粒甜到有啲漏,不如下年先再包過」

「叫伯母考慮下次用金莎包湯丸」

「叫佢轉整麥提莎糯米糍」

「會散~ 係咪伯母冇用熱水開糯米粉?」

「係咪過年有人送咗幾盒麥提莎俾你哋佢想快啲食哂咋」

「千祈唔好話好食, 佢就以後都係咁樣煮! 我就係之前同阿媽講話佢整嘅 「片糖麥皮」 好好食,我三年小學既早餐都係食呢個」

「你睇下你老母對你幾好」

「一番心意, 如果係我, 忍住嘔都食埋佢」

「我諗起之前有個巴打話想食橙結果成個雪櫃變晒橙」