【唔只Saving】原來「游生」都係暖男!

大台劇《不懂撒嬌的女人》今個禮拜進入結局篇,強悍Mall姐(宣萱飾)喺舊情人Gordon(林文龍飾)愛情滋潤下,大女人急變小女人,同Gordon有難同當有鑊齊揹,至於Saving哥(王浩信飾)同Cherry(唐詩詠飾)呢一對,原本有情飲水飽一直甜蜜,惜埋門一腳到結婚嗰陣,又因Saving哥有恐婚症而起波瀾。

劇情嚟緊轉入直路,雖然主線骨幹離唔開感情戲,但劇中另一亮點,首選今年45歲嘅袁文傑,憑住劇中霸氣形象同高大威猛嘅身材,成功彈出,吸引到一班網民追捧,算係喺亞視之友轉投無綫當中,最快上位嘅一個。

靚仔有型嘅袁文傑,其實好早已經名草有主,同港姐出身嘅前兒童節目主持張潔蓮(Jackeline姐姐),至今拍拖6年 。

周三(24日)晚上8點半,有讀者見到袁文傑同女友Jackeline喺太古城商場出現。二人先喺商場行一輪街,再到一間連鎖壽司店醫肚。洪小姐表示:「因為袁文傑好高,好遠已經見到,佢同女友喺人多地方冇拖手,但去到少人啲嘅地方,男方就自自然然拖實女友隻手,認真細心。沿路見佢哋有傾有講,都好sweet吓。

其實喺商場一路都有人認得袁文傑,佢仲好nice,人哋問佢可唔可以影合照,佢即刻拎住電話同人selfie影相。」而喺6呎4吋男友嘅掩護下,Jackeline姐姐身形變得嬌小的骰。

其實張潔蓮之前接受訪問時,曾經講過同男友未有結婚打算,話順其自然,亦因為兩個人都鍾意小動物,所以暫時未有生B計劃。不過早排有周刊影到袁文傑同張潔蓮喺尖沙咀手拖手甜蜜睇婚紗,之後仲喺餐廳互喂大晒恩愛羨煞旁人,唔通游生都想成家立室?

 

 

 

(蘋果日報)

 

 

網友留言

個留言

喜歡我們的文章嗎?按個讚吧!

關 閉 視 窗

(0)