港大舍堂欺凌Freshmen 女宿生控訴遭要脅半裸拍片「陪酒」 (有片)

607

有 HKU 女宿生喺連登討論區帖出六千字長文及短片,控訴遭「大仙」(高年級同學) 欺凌,以住宿資格作要脅,希望校方能正視問題,別讓今年9月入學的新生再受欺凌。

懶人包:

我喺HKU偉倫堂住嘅一整年不停被樓友同大仙欺凌,身心都受到好大嘅壓力,啲大仙會不停對我哋提出好多無理嘅要求,例如為咗Hall Festival條片出位,不惜趁Freshmen瞓緊覺用一桶水淋醒佢,同埋逼Freshmen半裸拍片。啲大仙喺更多嘅時候為咗自己嘅利益會對我哋強詞奪理,我作為一個Freshman只可以敢怒不敢言,喺呢一年入面我受咗佢哋好多好多嘅壓搾,希望今年新入HKU嘅Freshmen喺決定住呢間Hall之前諗清楚啲自己係唔係適合呢一間Hall。

#原文太長, 最底另一篇文章有新聞片


連登討論區原文:

恭喜咁多位Freshmen加入HKU。相信咁多位Freshmen都好期待自己嘅U Life,而住Hall亦都係大家可能會想體驗嘅事,但係作為一個過來人,我好想提醒大家揀住邊一間Hall嘅時候必須謹慎選擇,否則如果入咗一間根本唔適合你嘅Hall,又或入咗一層唔適合你嘅樓,等緊你嘅只會係無止境嘅折磨同痛苦。

跟住落嚟我會講吓過去呢一年內,我喺偉X堂經歷過嘅事,同埋受到前樓友同大仙,甚至係我嘅同年仙欺凌嘅經過。我想講嘅係寫呢篇文嘅目的並唔係想一竹篙打一船人,喺呢間Hall入面亦都會有友善嘅人,我只係想同大家講吓我所經歷同埋住嘅嗰一層所發生嘅事,等咁多位Freshmen喺考慮報邊一間Hall嘅時候可以睇下。

其實當你入咗偉X堂之後,決定你住邊一層樓嘅就係Hall莊。不過,Hall莊落嘅決定只係建基於佢哋觀察到嘅你嘅「性格」適合邊一層。而佢哋可以接觸到你嘅時間通常都只有短短嘅一兩日Touch Camp, 甚至係只有10幾分鐘嘅Interview,可想而知個決定係幾咁倉猝同埋主觀。喺我一開始住咗無耐,我已經知道自己並唔係我住緊嘅嗰層樓嘅「性格」,我嘅朋友同屋企人都覺得我唔係呢一層樓嘅人。但係,曾經我以為就算「性格」唔同,只要時間耐咗都可以同我嘅前樓友玩得埋,但原來佢哋只係會去杯葛同佢哋價值觀唔同嘅人。

我喺住喺偉X嘅期間受到佢哋好多生理同心靈上嘅折磨,仲有金錢上嘅損失,佢哋完全唔會理會我嘅感受,我亦都唔係冇試過反抗佢哋對我種種嘅無理要求,只係反抗咗之後換嚟嘅只係更加徹底嘅杯葛同埋更加多嘅壓力。

首先,喺生理上,佢哋會不斷剝削你嘅休息時間去做一啲完全無意義嘅事,例如樓O期間,佢哋要求我哋由HKU,喺冇錢同埋冇水飲,而幾個Freshmen得一部電話嘅情況下,兩個鐘內跑上山頂凌宵閣自拍Send返俾佢哋再跑返落HKU, 然後再做一系列體能運動,例如青蛙跳、喺好𠝹手嘅磚地上面做手推車 ,跟住仲逼我哋喺廿秒內飲哂一罐可樂,飲唔哂就要將飲淨嘅可樂兜頭淋哂落自己身上,完全唔明白做完之後我哋可以有啲乜嘢得著。

跟住喺準備緊Hall Festival期間,每層樓都要準備一條片,拍片當日係舊年嘅HKU Info Day,我哋 Freshmen當日已經要幫手企Hall Booth,夜晚佢地仲逼我哋要去唔同地方拍片拍到凌晨,當日凌晨兩點先喺蘭桂坊拍完,第二朝五點就要起身去鴨脷洲繼續拍,之後仲有幾次晨咁早去其他地方拍。我同過佢哋講我要上九半嘅堂,佢地完全唔會理,同埋就算你冇份入鏡,你個人都要出現。而唔洗拍片嘅夜晚亦都唔係咁輕鬆,一係就影相影到凌晨一兩點,一係就要剪片,一剪片就會由夜晚剪到凌晨,試過佢哋由夜晚十點開會,開到凌晨四五點,第二朝八點繼續開,但係其實大部份時間佢哋都只係喺度講是非,就算你冇野講,你個人都要出現,唔會俾你去休息。

瞓瞓下覺俾人淋水拍醜態: (原片已被刪除)

佢哋為咗要令層樓喺Hall Festival出位,有試過趁一個Freshman夜晚瞓緊覺,兜頭淋佢一桶水淋醒佢去拍低佢嘅反應,仲有逼Freshmen半裸上身拍片。其實如果啲大仙覺得冇問題,點解佢哋唔自己俾人淋水,自己半裸拍片,要逼我哋Freshmen做呢啲嘢?你可能會覺得我冇反抗好傻,但係當時喺極大嘅朋輩壓力之下係根本係冇得反抗,而之後我經歷嘅事亦都證實咗就算當時我反抗咗都只係會加速佢哋對我嘅杯葛同排擠。呢兩條片就係佢哋逼我哋拍嘅嗰段片。

(樓主剪短了,公開版本唔見樣)

而喺心靈方面,佢哋用咗好多方式踐踏我嘅自尊。喺準備緊Hall Festival條片嘅時候,佢哋叫我幫手剪片,我花左好多時間剪完條片之後,佢哋就話我剪得唔好,要再剪。我問返佢哋邊個位我剪得唔好,想改返,佢哋又唔話俾我知,總之就話我剪唔好,但同時又要我繼續剪埋其他片。之後我剪嘅片,佢哋睇都唔睇就話唔好,跟住佢哋又重新再剪過。其實我覺得如果我剪得唔好,佢哋可以搵其他人剪或者同我講邊個位要點樣改,而唔係要我繼續剪其他落去,剪完睇都唔睇就唔用,特登浪費我付出咗咁耐嘅心血同時間。佢哋之後又借我部MacBook去剪片,但係有個大仙又話我部MacBook好慢好廢,仲好大力打落我個Keyboard度,最大個問題係佢哋自己根本就個個都有自己嘅電腦,我真係唔明點解佢哋要咁樣做。喺完咗Hall Festival之後嘅Evaluation Meeting度, 啲大仙會攞我同其他樓友比較,會同做得唔好嘅樓友講咩「連佢(我個名)都做得好過你」。就算我真係做得未合乎佢地嘅「standard」,佢地可以其他方法解決例如同我講,但未至於要換嚟咁樣嘅對待。

之後,有一個同層嘅大仙將一張「床位空置告示」 釘落我塊Board度。因為我冇Roommate,嗰張「床位空置告示」本身係喺我對面嗰個床位度,佢哋咁樣做只係好明顯想同我講佢哋冇當過我住喺呢層樓度。我喺Evaluation Meeting度喺佢地面前講咗呢件事出嚟,佢地一開始無人認,仲想將責任推落清潔姐姐度,但係其實清潔姐姐一早知道我住緊喺度,更何況佢根本唔會無啦啦將呢張告示由對面個床位度搬過嚟我塊Board度。當時我有個同年仙指出係同層某大仙將嗰張告示釘落我塊Board度,佢先認係佢做,但係仲話唔記得自己有做過,我真係完全唔明白佢哋嗰種心態係點樣。

之前樓O期間,Freshmen要Visit同層嘅大仙,喺嗰個釘我Board嘅大仙約咗我哋所有Freshmen都要同某一層男層喺男層Pantry度飲酒嘅嗰晚,有同年仙同我講佢自己喺我地層樓度㩒電話,叫我去搵佢做Visit,我去到問佢可唔可以而家同佢做Visit(當時係凌晨十二點幾),佢話要完咗同男層飲酒先可以同佢做Visit,跟住有個同年仙同佢講有男仔借醉抽Freshmen水,佢竟然話「咁人哋而家有冇姦緊佢先?冇就返去繼續飲啦」,最後佢同我凌晨五點幾先做完Visit,之後佢仲自己同其他大仙打牌,而其實我第二朝仲要返九半。嗰陣我真係俾佢哋搞到個人好攰,更加唔明白嘅係點解佢哋可以咁自我中心,完全唔會理其他人嘅感受。

十月Visit Period 期間(即係Freshmen要喺十月內Visit大概80個喺Hall住緊嘅人,要同佢哋傾計最少兩個鐘),我層樓嘅大仙唔俾我哋Freshmen同其地樓嘅人講佢哋做過嘅野,怕其他人會知道,佢地仲會問同我哋做過Visit嘅Currents我哋同佢哋講過嘅野,確保我哋冇將佢哋做過嘅事講出去,除咗作賊心虛之外我諗唔到對佢哋呢一個行為嘅解釋。

我好努力同真心咁當佢哋係朋友咁對待,好似我去旅行會特登親手整手信俾佢哋、佢哋走堂會幫佢哋Take Attendance,自己一個人做哂本來大家分工合作嘅事都冇任何怨言、借自己嘅風筒俾佢哋用,即使佢哋每次用完個風筒唔主動還返比我,要我自己去佢哋房拎返,換嚟嘅只係一次又一次嘅出賣。之前我哋喺Hall Festival嘅時候要擺個賣早餐嘅Booth籌錢,嗰陣前一晚凌晨一兩點先拍完片,朝早五點就要喺Pantry集合整早餐賣,我同佢哋講過一陣仲要上九半嘅堂,正常人都會攰。不過佢哋都要我留喺個Booth度等到九點先俾我走,我同我嘅同年仙呻攰,佢哋就扭曲咗我講嘅嘢,同大仙講話我好憎個早餐Booth,之後大仙就喺Evaluation Meeting度因為呢句不實嘅言論話咗我好耐,我之後就再唔敢同佢哋講心底話,因為我真係唔知幾時會俾佢哋出賣,攞嚟當茶餘飯後嘅話題嚟講。

呢啲都只係舊年Sem1發生嘅野。我嘗試過忍氣吞聲同埋融入佢哋,因為我以為只要時間耐咗,我哋都會會變Friend,會相處得更好。但係原來我嘅選擇只係令到佢哋變本加厲,更加不留餘力咁去欺凌我。跟住落嚟我會講埋喺Sem2我所經歷過嘅事,令到我決定離開呢一間從一開始就冇當過我係一份子嘅Hall。

今年三月,我哋層樓五個Freshmen要負責整樓Tee。本身我哋五個都要分工合作,而負責呢件事嘅Person-in-charge本來都唔係我,但係其他四個完全冇理過件事,亦都冇幫過手,啲大仙就係咁Chur我一個要搞掂呢件事,我就無啦啦被逼做咗Person-in-charge,要將所有嘢自己一腳踢,好似設計件Tee、仲要逐個大仙PM問佢哋嘅Size同意見、聯絡廠商同埋拎貨上樓。我本身都己經諗住自己一個做哂就算,但係我嗰陣唔係好夠錢用,俾唔到訂金。嗰陣啲大仙要我一個人幫佢哋俾哂全層樓嘅Tee錢先,所以我就去問其地同年仙可唔可以幫手俾住筆訂金先,結果佢地都已讀不回我。

我再問樓主可唔可以收咗樓友錢先落訂,佢話可以,之後仲話會過數俾我,但係其實佢最後都冇俾過任何錢我。於是,我就打算喺樓Group叫大家俾咗自己嗰份錢先,但係當時嘅Financial Secretary主動提出用樓費俾,我仲特登問多次佢係唔係可以用樓費「直接」訂樓Tee,佢又話可以,仲問我想佢幾時俾錢我,我同佢講我會當晚搵佢,結果當晚搵佢又話第二日先俾我。之後佢就話將筆錢俾我啲同年仙,但係佢地話冇收過任何錢。點知個Fin Sec突然反口話要我哋自己出錢俾咗訂金先再Claim返,仲話第二晚之前一定會Claim返俾我,冇走數。咁我就同其他同年仙講話要我哋五個夾錢俾訂金,佢哋一開始唔肯夾,話分開Claim錢好麻煩,要我一個人俾哂先。我同佢哋講我自己一個真係俾唔到,佢哋仲係繼續講好多嘢去逼我自己一個俾哂。其中一個同年仙仲話自己都冇錢,但係之後又可以請到全層食宵,唱樓K嘅時候仲主動話會幫大家手俾錢。嗰陣我只係覺得自己一直都只係俾佢哋消費緊。雖然去到最後我哋每人都夾左一部份嘅錢,但係個Fin Sec到而家我Quit咗之後都冇Claim過錢俾我, 淨係Claim咗錢俾其他同年仙。

之後,四月都發生咗一件對我唔公平嘅事,而當我選擇反抗,據理力爭嘅時候,換返嚟嘅只係徹底嘅杯葛同排擠。當時,我有一枝煉奶放咗喺公家雪櫃度。有一日返到Hall,發現我枝煉奶漏咗啲喺雪櫃入面,仲俾人放咗喺浸哂水嘅洗手盤入面,所以被逼要扔。但係我扔之前睇過枝煉奶係完好無缺,加上我上一次用係幾個月之前,由於嗰排local雪櫃發生過多次被偷嘢食嘅事件,所以好大機會係俾其他人偷咗嚟用之後整到咁。之後因為個雪櫃整污糟咗,我啲前樓友就逼我去洗雪櫃,但係明明係有人偷咗我啲嘢,仲整污糟埋個雪櫃,而家就要我去執手尾,根本就唔合理。我想請佢哋查清楚係邊個偷嘢,再叫返偷嘢嗰個人清理返。一開始啲大仙就叫本身四月負責洗雪櫃嘅人清理,但係負責洗雪櫃嘅Freshman就叫我一個人去搵係邊個搞到咁,言下之意就係唔想洗,之後我所有樓友都係咁將個責任推落我度,我嘗試據理力爭,因為明明自己先係喺咩都唔知嘅情況下俾人偷嘢。有個大仙仲俾說話我聽「講咁耐自己洗仲快」,我就決定反抗,同佢講話咁不如佢去洗,好快佢哋就冇預警咁踢咗我出樓 WhatsApp Group。其實邊個去洗雪櫃真係好小事,我知道佢哋只係想搵個藉口踢我出Group。之後,佢哋完全冇打算同我溝通去解決呢件事,見到我又直行直過,仲做埋好多小動作,好似搣咗有我樣嘅門牌,喺樓白板畫晒除咗我之外所有人嘅樣,收埋哂Pantry公用嘅煮食器具,好似收埋個焗盤喺兩個紙箱中間同埋收埋啲煲喺雪櫃入面。發生咗呢件事之後,我下定咗決心要離開呢間Hall。

完咗Sem之後,我都離開咗偉X。直到最近,由於樓Tee嗰筆錢佢哋拖咗半年一直都冇Claim返俾我,我聯絡咗我啲前樓友想攞返筆錢。點知佢哋不停咁用好多唔同藉口去同我講話唔會Claim返俾我。我去問而家嘅新樓主可唔可以Claim返筆錢俾我,佢就用而家冇新嘅Fin Sec,自己爆咗Credit Card Limit之類嘅藉口話唔得,當我提議過數俾我嘅時候佢就直接唔理我。之後,當我提議可以用樓費Claim,新樓主就同我講筆樓費俾佢哋全部人攤分哂,冇分到俾我。因為本身我都有交上兩個Sem嘅樓費,所以理應我都可以分返。但係當我問佢點解唔分俾我嘅時候,佢又再已讀不回我。

於是,我唯有去搵Warden同Tutor幫手介入,但係佢哋了解完件事之後就完全冇任何後續行動。而且我啲前樓友喺Tutor面前講嘅又係另一樣嘢,話唔係唔Claim俾我,又話要收返我「Sem2最後一次樓費」先會退返用淨嘅樓費俾我,問題佢地根本冇叫過我交呢筆樓費,就屈我冇交,明明唔係我唔肯交樓費。之後,當我繼續問佢哋原本sem1+sem2啲樓費用咗去邊同埋「sem2最後一次樓費」究竟收咗幾多錢嘅時候,發現咗佢哋條數其實係極度混亂,而佢哋都冇證據證明佢哋有收過所謂嘅「Sem2最後一次樓費」,更何況佢哋講出嚟條數都有好多唔合理嘅地方,例如一時話每人分咗$200 , 一時又話每人分左$10。佢地一直迴避我提出條數唔合理嘅問題,當我繼續追問落去嘅時候,新樓主話一定要同我當面開個會傾先會Claim返錢俾我。但係當我提議日期地點俾佢哋嘅時候佢哋又冇講得唔得閒,問返佢哋幾時得閒佢哋又唔覆我。佢仲無啦啦反客為主話我態度好差,仲話如果我繼續咁樣嘅話就會Block咗我WhatsApp,除咗心虛之外,真係諗唔到點解佢要咁做,所以我都幾肯定我筆錢應該係追唔返,尤其當Warden同Tutor都淨係了解呢件事,而冇乜後續行動去幫我解決呢件事嘅時候,令到我對呢間Hall徹底死心,亦都唔想任何人重蹈我嘅覆轍,所以就想用我嘅個人經歷去話俾今年嘅Freshmen知,一定要謹慎咁去揀Hall去住,先會有一個開心嘅U Life。

我上年成年交咗成千蚊樓費,樓O又會罰Freshmen好多錢,與其話罰Freshmen,倒不如話係罰Freshmen嘅父母,因為佢哋唔會同你講收咗咁多人夾埋成萬幾蚊拎黎做咩。你交稅俾政府,佢都會有份財政預算案講會點用啲錢,但層樓啲人係唔會話你知,仲會袋埋你嗰份錢。

佢哋由我第一日入偉X開始就對我有好多先入為主嘅意見,好似我對佢哋講嘢客氣佢哋就話我假,Pantry有段時間俾人整到周圍都係食物漬,我同咗一個大仙講,佢就以為係我整到咁,如果我唔澄清返,佢哋就會一直以為係我做。而佢哋都好鍾意以出嚟社會做嘢都會有咁嘅遭遇為由,無理咁搾壓你,踐踏你嘅自尊。但係其實即使喺工作上遇到咁嘅待遇,要受人氣,起碼你都可以話係為咗份糧捱落去,真係承受唔住大不了就辭職。但係住Hall受佢哋氣,不但冇人工出,一旦交咗Hall Fee,想早走都唔會退返Hall Fee俾你。

我寫呢篇文唔怕俾人知道我係邊個,間Hall咁少人亦都好容易知道我係邊個。我只係想俾大家知道就算係大學生,都會發生咁嘅事,就算你無錯,佢哋都可以強詞奪理話係你錯。就算我真係做得唔夠好,符合唔到做佢哋Freshmen嘅「Standard」,佢哋可以有好多唔同解決方法,但係唔係咁樣做咁多小動作去欺凌一個人。而我好肯定我唔係第一個俾佢哋咁樣對待,因為我嗰層樓每年嘅流失率都好高,Year 2升Year 3同Year 3升Year 4 呢兩屆都由本身八個人得返每屆各一個,而全層樓得大概十個人,但我希望我係最後一個受到呢班人咁樣對待。


另外《蘋果日報》今日亦有短片報導:

港大偉倫堂爆性醜聞 女宿生控訴遭要脅半裸拍片「陪酒」 (有片)